उर्लाबारी । राष्ट्रिय आविष्कार केन्द्रका अध्यक्ष एवं प्रख्यात सामाजिक अभियन्ता डा. महावीर पुनलाई उर्लाबारी नगरपालिकाले एक विशेष कार्यक्रमका बीच स्वागत गरेको छ। वीरगञ्जमा स्थापना गर्न लागिएको कृषि औजार कारखानाका लागि प्रेरणाका रूपमा प्रकाशित पुस्तक ‘महावीर पुनः सम्झना, सपना र अविरल यात्रा’ को बिक्री अभियान अन्तर्गत उर्लाबारी आएका पुनको सम्मानमा बुधबार नगरपालिकाको सभाहलमा कार्यक्रम सम्पन्न गरिएको हो।

कार्यक्रममा नगरउपप्रमुख मीना खतिवडा पौडेलले वैज्ञानिक पुनले कृषिमा निर्भर नेपाली जनताको हितका लागि आधुनिक कृषि औजार उत्पादन गर्ने अभियान अत्यन्तै सराहनीय रहेको बताउँदै उर्लाबारी नगरपालिकाको तर्फबाट पूर्ण समर्थन रहने प्रतिबद्धता जनाउनुभयो। उहाँले देशमै केही गरौं भन्ने सोच बोकेका व्यक्तित्वलाई साथ दिनु सबै नागरिकको कर्तव्य रहेको धारणा राख्नुभयो।

नगरपालिकाका प्रमुख प्रशासकीय अधिकृत अभयकुमार गुप्ताले स्वागत मन्तव्य राख्दै डा. पुनजस्ता internationally renowned वैज्ञानिकसँग प्रत्यक्ष साक्षात्कार हुने अवसर पाएकोमा खुशी व्यक्त गर्दै उहाँको अभियानले देश विकासको नयाँ ढोका खोल्ने विश्वास व्यक्त गर्नुभयो।

सो अवसरमा बोल्दै डा. महावीर पुनले वीरगञ्जमा कृषि औजार उत्पादन गर्ने कारखाना स्थापना गरी आयातमा निर्भरता कम गर्ने, युवालाई स्वरोजगार र आत्मनिर्भरता तर्फ प्रेरित गर्ने तथा आम नागरिकमा देशप्रतिको दायित्वबोध जागृत गराउने उद्देश्यले आफू देश दौडाहामा रहेको स्पष्ट पार्नुभयो।

कार्यक्रमको अन्त्यमा उर्लाबारी नगरपालिकाका कर्मचारीहरुले एक/एक थान पुस्तक खरिद गरी डा. पुनको अभियानप्रति ऐक्यबद्धता जनाएका थिए। यस अवसरले स्थानीय सरकार तथा जनसमुदायमा वैज्ञानिक सोच र नवप्रवर्तनप्रतिको जागरण थप बलियो भएको देखिएको छ।