काठमाडौँ । भिजिट भिसा प्रकरणमा मुछिएका गृहमन्त्री रमेश लेखकको राजीनामा माग गर्दै विपक्षी दलका भ्रातृ संगठनहरूले मंगलबार काठमाडौँको माघइतीघर मण्डलामा प्रदर्शन गरेका छन्।

प्रमुख प्रतिपक्ष दल नेकपा (माओवादी केन्द्र) सहित समाजवादी मोर्चामा आवद्ध दलका युवा तथा विद्यार्थी संगठनहरूले प्रदर्शनमा सहभागिता जनाएका हुन्। प्रदर्शनको क्रममा गृहमन्त्री लेखकमाथि आपराधिक गतिविधिमा संलग्न भएको आरोप लगाउँदै उनको तुरुन्त राजीनामाको माग गरिएको छ।

प्रदर्शनमा माओवादी केन्द्रका भ्रातृ संगठन अखिल (क्रान्तिकारी) र योङ कम्युनिष्ट लिग (वाईसीएल), नेकपा (एकीकृत समाजवादी) का अनेरास्ववियू र युवा संघ नेपाल, नेपाल कम्युनिष्ट पार्टीका अखिल (समाजवादी) र युवा संगठन नेपालका कार्यकर्ताहरू सहभागी थिए।

प्रदर्शनका क्रममा नाराबाजी, प्लेकार्ड प्रदर्शन र मन्तव्य कार्यक्रम गरिएको थियो। उनीहरूले सरकारलाई भ्रष्ट्राचार र अनियमितता ढाकछोप गर्न नदिन चेतावनी दिएका छन्। प्रदर्शन शान्तिपूर्ण ढंगले सम्पन्न भएको प्रहरीले जनाएको छ।

यसअघि भिजिट भिसाको नाममा व्यापक अनियमितता भएको भन्दै गृहमन्त्री लेखकको भूमिका प्रश्नवाचक बनेको छ। संसद्‍मा समेत यस विषयमा बहस चलिरहेको छ।